Prishtinë, 12 korrik, 2023 – Edicioni i fundit i serisë Kafeneja e Ndërmarrësisë, kushtuar temës “Mësimi i vazhdueshëm për zhvillimin e bizneseve fillestare (start-ups)”, u përcoll me një takim dinamik të më shumë se 15 bizneseve në pronësi të grave dhe minoriteteve. Organizuar nga z. Besnik Krasniqi, Drejtor Ekzekutiv i BSCK-së, ky event shtjelloi temën e mësimit të vazhdueshëm si çelës për avancim në ndërmarrësi.
Mes një atmosfere entuziazmi, pjesëmarrësit u përfshinë në një diskutim të hapur produktiv. Z. Besnik Krasniqi udhëhoqi me zotësi bisedën, duke i ofruar të pranishmëve një mori njohurish mbi rolin vendimtar të të mësuarit të vazhdueshëm në rrugëtimin e startup-eve. Një ide e përbashkët u theksua gjatë diskutimit, ajo e përfitimeve të shumta që sjellë përkushtimi ndaj të mësuarit në një mjedis biznesi që ndryshon vazhdimisht. Në këtë rast u theksua edhe rëndësia kryesore e nxitjes së një mendësie përparimtare në mesin e ndërmarrëseve, duke potencuar nevojën për t’i parë sfidat si mundësi dhe si një rrugë drejt përmirësimit.
Në qendër të bisedës ishte eksplorimi i strategjive praktike që ndërmarrëset mund t’i përvetësojnë për të krijuar një kulturë të të mësuarit të vazhdueshëm në startup-et e tyre siç janë:
- Shfrytëzimi i trajnimeve nga bizneset fillestare (startup): Përdorimi i programeve të përshtatura të trajnimit të krijuara posaçërisht për startup-et i pajisë ndërmarrëset me njohuritë dhe shkathtësitë thelbësore për sukses.
- Përvetësimi i të mësuarit mikro: Përvetësimi i moduleve të përqendruara dhe në madhësi të vogël të të mësuarit, të njohura si mikro-mësime, u mundëson ndërmarrëseve ta integrojnë mësimin në oraret e tyre të ngarkuara.
- Kërkimi i mentorëve: Angazhimi me mentorët ofron një mundësi unike për të fituar njohuri të çmueshme, për t’i shfrytëzuar perspektivat me përvojë dhe për t’u përballur me kompleksitetin e ndërmarrësisë me më shumë qartësi.
Diskutimi i hapur u shndërrua në një shkëmbim të përvojave, strategjive dhe aspiratave. Kafeneja e Ndërmarrësisë demonstroi edhe një herë aftësinë e saj në bashkimin e perspektivave të ndryshme, nxitjen e ndarjes së njohurive dhe frymëzimin e rritjes reciproke. Gjersa sesioni po mbyllej, ndjenja e përbashkët midis pjesëmarrësve ishte ajo e fuqizimit. Të pajisur me vendosshmëri të re dhe njohuri të thellë të rëndësisë së të mësuarit të vazhdueshëm, këto ndërmarrëse e përfunduan takimin me një bindje të përbashkët për të mirëpritur ndryshimin dhe për t’i shtyrë startup-et e tyre drejt zhvillimit të qëndrueshëm.
